Mynto | Auðveldari vefverslun

Skilmálar

Samþykki notkunarskilmála Mynto

Halló, við erum Mynto ehf. (kennitala: 620501-2470, vsk nr. 135891). Skrifstofur okkar eru í Brautarholti 4, 105 Reykjavík. Þegar þú notar Mynto appið eða Mynto vefinn (hér eftir Mynto) þá gilda þessir skilmálar. Þeir eru bæði mikilvægir fyrir okkur og þig, vegna þess að þeir tryggja hagsmuni okkar beggja og veita þér hagnýtar upplýsingar. Með því að samþykkja þessa skilmála lýsir þú yfir að hafa lesið, skilið og samþykkt skilmálana í heild sinni. Þarftu að vita meira? Endilega hafðu samband við okkur á Facebook eða gerðu það á gamla mátann og sendu okkur tölvupóst á hallo@mynto.is.

Öryggi og persónuvernd

Fyrir okkur hjá Mynto er traust, öryggi og trúnaður í forgrunni og leggjum við mikið upp úr því að tryggja okkar viðskiptavinum að persónuupplýsingar séu meðhöndlaðar með þeim hætti. Mynto er því ábyrgðaraðili við vinnslu gagna, eins og skilgreint er í lögum um persónuvernd og reglugerð Evrópusambandsins (GDPR) og er vinnsla persónuupplýsinga heiðarleg, örugg, ábyrg og gagnsæ. Þú hefur rétt á því að óska eftir aðgengi að þeim upplýsingum sem Mynto á um þig, leiðrétta upplýsingar um þig, eyða upplýsingum og eða nýta þér önnur réttindi sem kveðið er á um í gildandi persónuverndarlögum. Hægt er að nálgast persónuverndarstefnu Mynto á mynto.is. Frekari upplýsingar um persónuverndalögin er hægt að finna inná heimasíðu Persónuverndar. Markmið okkar er að auðvelda fólki að versla vörur og þjónustu á netinu. Svo hægt sé að versla með auðveldum og þægilegum hætti bjóðum við notendum að vista greiðslukortin sín á Mynto. KORTA er samstarfsaðili Mynto og sér um færsluhirðingu og hýsingu kortaupplýsinga fyrir notendur. Þegar kort er skráð á Mynto verður til sýndarnúmer (e. token) hjá KORTA. Sýndarnúmerið er vistað undir hverjum og einum söluaðila á Mynto svo hægt sé að gjaldfæra greiðslukort við kaup hjá mörgum mismunandi söluaðilum. KORTA er fjármálafyrirtæki sem starfar undir eftirliti Fjármálaeftirlitsins. Allar upplýsingar um KORTA, öryggisstefnu félagsins og fleira er að finna á vefsíðu KORTA á vefsíðu KORTA. Þú sem notandi samþykkir einnig að Mynto megi senda persónuupplýsingar um þig til þeirra söluaðila sem þú verslar við á Mynto. Upplýsingar um þig og þín kaup fara úr Mynto og beint inn í vefverslunarkerfi söluaðila. Þetta er gert svo að söluaðilar geti afgreitt þínar pantanir sem allra fyrst. Ef þú hefur frekari spurningar um öryggismál, persónuverndarstefnu eða gagnasöfnun á Mynto er hægt að hafa samband með því að senda tölvupóst á hallo@mynto.is

Hvað eru vafrakökur (e. Cookies)?

Vafrakaka er lítil textaskrá sem vefsvæðið getur sett inn á tölvuna þína eða önnur snjalltæki þegar vefsvæði Mynto.is er heimsótt í fyrsta sinn. Textaskráin er geymd á vefvafra notenda og vefur Mynto þekkir skrána. Upplýsingarnar í textaskránni má nota til að fylgjast með vafri notenda á vefsvæðinu, til þess að bæta þjónustuna o.fl. Þetta gerir það mögulegt að Mynto getur sent ákveðnar upplýsingar í vafra notenda og getur gert upplifun notanda ánægjulegri. Vafrakökur geta innihaldið texta, númer eða upplýsingar eins og dagsetningar, en þar eru engar persónuupplýsingar um notendur geymdar.

Mynto notar vefkökur til að sníða vefsvæðið að þörfum notenda, t.d. til að vista stillingar notenda, til að vinna tölfræðilegar upplýsingar, til að greina umferð um vefsvæðið, í markaðslegum tilgangi og til að stuðla að virkni vefsíðunnar. Mynto notar bæði vefkökur frá fyrsta aðila og vefkökur frá þriðja aðila. Vefkökur frá fyrsta aðila eru vefkökur sem senda eingöngu upplýsingar til Mynto. Vefkökur frá þriðja aðila eru tilkomnar vegna þjónustu sem Mynto notar og senda upplýsingar til annars vefsvæðis í eigu þriðja aðila. Viðkomandi aðilar kunna einnig að tengja upplýsingar fengnar af vefsvæði Mynto við aðrar upplýsingar sem notendur hafa látið þeim í té, eða upplýsingar sem þeir hafa safnað með notkun notenda á þeirra þjónustu.

Þú og þín réttindi

Við gerum þá kröfu að allir notendur Mynto séu fjárráða einstaklingar. Þú samþykkir að þegar þú verslar á Mynto með greiðslukorti sé það í þínu nafni. Komi til breytinga á eignarhaldi Mynto mun það ekki hafa áhrif á réttindi og/eða skyldur notanda. Þjónusta Mynto mun haldast óbreytt óháð slíkum breytingum. Ef breytingar verða mun Mynto tilkynna þær fyrir þér með hæfilegum fyrirvara.

Á Mynto gilda lög um neytendasamninga nr. 16/2016.

Notendur Mynto (kaupendur) hafa að minnsta kosti 14 daga til þess að hætta við kaup (fer eftir skilmálum verslana) og eru þær vörur sem keyptar voru endurgreiddar að fullu. Vörurnar skulu vera í upprunalegu ástandi eða í því ástandi sem skilmálar viðeigandi verslunar segja til um.

Hafi notandi Mynto (kaupandi) notað þann rétt sinn að skila vöru(m) og fallið frá samningi um kaup þá er verslun skylt að endurgreiða honum án nokkurs kostnaðar þær greiðslur sem hann hefur þegar innt af hendi. Slík endurgreiðsla skal fara fram eins fljótt og kostur er og eigi síðar en eftir 30 daga.

Tekið skal fram að notendur Mynto (kaupendur) þurfa að skila vöru(m) í verslun eða vöruhús söluaðila og bera sjálfir sendingarkostnað.

Öryggisbrestur?

Ef að þú verður var við óeðlilega notkun eða greiðslur af greiðslukortinu þínu á Mynto sem þú telur þig ekki hafa framkvæmt, týndir símanum eða grunar að óviðkomandi aðili hafi vitneskju um aðgangsupplýsingar að Mynto aðganginum þínum, er það á þinni ábyrgð að láta okkur vita eða loka án tafar fyrir aðganginn og/eða kortið. Mynto áskilur sér þann rétt að loka fyrir aðganginn þinn eða aðra notenda ef grunur er um misnotkun eða ranga notkun af einhverju tagi kemur upp, að einhliða mati Mynto. Ef engin notkun hefur átt sér stað í 12 mánuði hefur Mynto þann rétt að loka aðganginum þínum.

Notkunarskilyrði

Mynto áskilur sér allan rétt að hafna umsókn um notkun appsins án þess að tilgreina ástæðu. Með því að samþykkja skilmála þessa heimilar þú Mynto að óska þeirra upplýsinga sem Mynto telur nauðsynlegar til að tryggja öryggi þjónustunnar, öryggi notenda og/eða öryggi utanaðkomandi aðila. Upplýsingaöflun getur falist í fyrirspurnum til notanda eða kröfu um staðfestingar frá honum vegna þeirra upplýsinga sem hann hefur gefið eða aðgerða sem hann hefur framkvæmt.

Tilkynningar

Mynto hefur leyfi til að senda þér tilkynningar með rafrænum hætti á það netfang og/eða símanúmer sem notandi hefur gefið upp í tengslum við þjónustuna. Mynto reynir að tryggja að allar tilkynningar berist notanda fljótt og örugglega en ábyrgist þó ekki að tilkynningar komist rétt og tímanlega til skila. Mynto ber enga ábyrgð á og er ekki skaðabótaskylt vegna þeirra tilkynninga sem Mynto kann að senda þér, hvorki vegna innihalds né vegna þess að tilkynningar berast ekki á réttum tíma. Með því að samþykkja þessa skilmála veitir þú Mynto leyfi að senda þér tölvupóst í markaðslegum tilgangi (það er alltaf hægt að afskrá sig af póstlistum Mynto).

Öryggi á vefnum

Við leggjum okkur fram við að vernda persónulegar upplýsingar með því að nota þá öryggisstaðla sem viðeigandi eru eftir eðli upplýsinganna. Við gerum allt sem skynsamlegt og viðeigandi getur talist til að koma í veg fyrir að slíkar upplýsingar glatist, verði stolið, óviðkomandi fái aðgang að þeim, þær verði opinberaðar, afritaðar, notaðar, þeim breytt eða eytt. Við leggjum sérstaka áherslu á að tryggja öryggi upplýsinganna þegar keyptar eru vörur á Mynto. Vefurinn notast við SSL-skilríki sem þýðir að öll samskipti eru dulrituð. Það gerir gagnaflutning á vefnum öruggari. SSL-skilríki kemur í veg fyrir að sjóræningjar veraldarvefsins komist yfir gögn sem send eru í gegnum vefinn, eins og t.d. lykilorð. Með skilríkjunum eru upplýsingar sem sendar eru dulkóðaðar og gögnin sem flutt eru á milli skila sér á réttan stað á öruggan hátt.

Vesen?

Ef eitthvað vandamál kemur upp, hvað sem það má vera, munum við hjá Mynto vinna úr því eins hratt og við mögulega getum. Fljót og þægileg samskipti við notendur skiptir okkur höfuðmáli.

Viltu skila og/eða fá endurgreitt?

Notfæri korthafi eða móttakandi vöru og/eða þjónustu sér lögbundinn skilarétt í tengslum við net-, póst- og/eða símapöntun, eða ef korthafi nýtir sér annan umsaminn skilarétt á söluaðili að framkvæmda kreditfærslu eða bæta korthafa umrædda fjárhæð með öðrum hætti. Ef þú óskar eftir því að skila vöru sem var keypt á Mynto, hefur þú rétt á fullri endurgreiðslu ef skilað er innan 14 daga, samkvæmt lögum (lög um húsgöngu- og fjarsölusamninga nr. 46/2000 og lög um neytendakaup nr. 48/2003). Skilmálar vegna vöruskila eru mismunandi eftir verslunum, en hægt er að nálgast skilmála hverrar verslunar á þeirra prófíl á Mynto. Skilavara skal þó vera ónotuð, skilað í góðu lagi og í upprunalegum umbúðum. Greiðslukvittun þarf einnig að fylgja með, en hægt er að nálgast greiðslukvittanir á Mynto undir “Mínar upplýsingar” flipanum.

Hugverkaréttindi

Allt innihald á Mynto, þar með talið vörumerki, texti, hönnun, grafík, ljósmyndir, myndir og ritstýrt efni er varið höfundarétti. Þér er ekki heimilt að nýta upplýsingar eða efni af Mynto í neinum tilgangi nema til persónulegra nota í samræmi við skilmála. Dreifing, fjölföldun og endurútgáfa á höfundavörðu efni Mynto er með öllu óheimil.

Breytingar á skilmálum

Þú hefur aðgang að gildandi skilmálum Mynto í appinu og á vef Mynto. Mynto áskilur sér rétt til að breyta ákvæðum skilmála þessara einhliða. Komi til breytinga á skilmálum sem eru þér til óhagræðis munu þær verða kynntar með minnst 30 daga fyrirvara með skilaboðum í gegnum appið, SMS tilkynningu eða tölvupósti á skráð netfang. Aðrar breytingar sem eru til hagræðis fyrir notanda, má tilkynna með skemmri fyrirvara. Þú samþykkir framangreindar aðferðir við upplýsingagjöf til þín. Í tilkynningu um breytta skilmála skal vakin athygli á því í hverju breytingar eru fólgnar og réttar þíns til að segja upp þjónustunni. Við lítum svo á að þú hafir samþykkt breytingar ef þú notar Mynto eftir að nýir skilmálar hafa verið kynntir og teknir í gildi. Mynto áskilur sér rétt til að hafa samskipti við þig og aðra notendur í gegnum SMS skilaboð, með skilaboðum í gegnum appið eða tölvupósti á skráð netfang. Mynto mun eingöngu senda upplýsingar til notenda er varða þjónustu fyrirtækisins en ekki áreiti frá þriðja aðila. Öll mál, sem rísa kunna af notkun Mynto skulu, nema á annan veg sé samið, fara eftir íslenskum lögum. Rísi mál vegna brota á skilmálum þessum eða ágreinings um túlkun þeirra má reka það fyrir Héraðsdómi Reykjavíkur.

Gildistími

Skilmálar þessir eru gefnir út af Mynto og gilda frá og með 20. júní 2020 og til þess tíma er nýir skilmálar taka gildi.